KRAFT er glade for å huse og ønskje velkomen til prosjektet Lyspunkt!
Opner fredag 18. september kl. 18–20, står til og med sundag 27. september kl. 16.

Utstillinga er laga av over tjue menneske som nyttar seg av tilbodet KreAktivt Verksted (KAV), eit dagtilbod i regi av Kirkens Bymisjon. På KAV møtest folk med og utan rusvanskar, folk som av ulike årsaker ikkje har ordinært arbeide. Deltakarane på tilbodet har ulike bakgrunner, ferdigheiter og forutsetnadar, men har samlast kring temaet lys.

Utstillarane har arbeidd med leire, og nytta ulike teknikkar for å skape bruksgjenstandar knytte til lys. I utstillinga finn vi resultat av både dreiing, støyping, pølse-, plate- og frihandsteknikk, der somme har lat intuisjonen vere leiestjerne og andre har gått inn i prosjektet med tydelege preferansar og visjonar.

Lys og liv heng saman. Somme tider er lyset i livet lite og konkret – ei lampe som tennest for å lese dei siste sidene i ei bok eller finne den der dingsen i roteskuffa. Ei glime frå ei hovudlykt nattestid, ei solstråle som treffer eit andlet, eller eit blaff frå ein einsleg flamme. Andre gonger er det dei symbolske samanhengane som slår inn, der lyset, om enn berre i glimt, kan få uventa konsekvenser og vekse seg stort og vakkert.

“Lys står for liv, glede og håp”.

“Utan lyset lever vi ikkje”.

Lyspunkt er ei utstilling der lyset får skine i ulike keramiske former og uttrykk. Vi håpar ho vert eit lyspunkt også for deg.