KRAFT er glade for å huse og ønskje velkomen til prosjektet Lyspunkt!
Opnar fredag 18. september kl. 18–20, står til og med sundag 27. september kl. 16.

Utstillinga er laga av over tjue menneske som nyttar seg av tilbodet KreAktivt Verksted (KAV), eit dagtilbod i regi av Kirkens Bymisjon. På KAV møtast folk med og utan rusvanskar, som av ulike årsaker ikkje har ordinært arbeide. Deltakarane på tilbodet har ulike bakgrunner, ferdigheiter og forutsetnadar, men har samlast kring temaet lys.

Utstillarane har arbeidd med leire, og nytta ulike teknikkar for å skape bruksgjenstander knytt til lys. I utstillinga finn vi resultat av både dreiing, støyping, pølse-, plate- og frihandsteknikk, der somme har latt intuisjonen vere leiestjerne og andre har gått inn i prosjektet med tydelege preferansar og visjoner.

Lys og liv heng saman. Somme tider er lyset i livet lite og konkret – ei lampe som tennast for å lese dei siste sidene i ei bok eller finne den derre dingsen i roteskuffa. Ei glime frå ei hovudlykt nattestid, ei solstråle som treff eit andlet, eller eit blaff frå ei einsleg flamme. Andre gonger er det dei symbolske samanhenger som slår inn, der lyset, om enn berre i glimt kan få uventa konsekvenser og vakse seg stort og vakkert.

“Lys står for liv, glede og håp”.

“Utan lyset lev vi ikkje”.

Lyspunkt er ei utstilling der lyset får skinne i ulike keramiske former og uttrykk. Vi håpar ho vert eit lyspunkt også for deg.